पुणे : गिरिप्रेमी या प्रसिद्ध गिर्यारोहण संस्थेच्या प्रमुख मोहिमांचे नेते उमेश झिरपे यांनी ‘माउंट मेरा’ या नेपाळमधील सहा हजार ४७६ मीटर उंच शिखरावर यशस्वी चढाई केली. त्यांनी ही चढाई एकट्याने (सोलो) केली. ११ ऑक्टोबर रोजी सकाळी सातच्या सुमारास झिरपे ‘माउंट मेरा’ शिखरावर पोहोचले. नेपाळमधील सोलोखुंबू प्रदेशातील महालंगुर या हिमालयाच्या पर्वतरांगेमध्ये माउंट मेरा पर्वत आहे.
५४ वर्षीय झिरपे हे ज्येष्ठ गिर्यारोहक असून, त्यांना हिमालयातील ४०हून अधिक शिखर मोहिमांचा अनुभव आहे. त्यांच्या नेतृत्वाखाली गिरिप्रेमी संस्थेच्या संघांनी माउंट एव्हरेस्ट व माउंट कांचनजुंगासह सात अष्टहजारी (आठ हजार मीटरहून अधिक उंची असलेल्या) शिखरांवर यशस्वी चढाई केली आहे. अशी कामगिरी करणारे झिरपे हे भारतातील पहिले व एकमेव गिर्यारोहण मोहीम नेते आहेत. त्यांच्या गिर्यारोहण क्षेत्रातील कामगिरीचा सन्मान म्हणून महाराष्ट्र शासनाने त्यांना यांना श्री शिवछत्रपती पुरस्काराने गौरविले आहे. माउंट मेरा हे शिखर सर केल्याने त्यांच्या शिरपेचात मानाचा आणखी एक तुरा खोवला गेला आहे.
(उमेश झिरपे यांची मुलाखत वाचण्यासाठी येथे क्लिक करा.)